مهارات التسويق فى اختيار شريك الحياة ؟!

 

مفيش عندك عروسة ؟

عزيزى القارئ عندما تقرأ هذا المقال فلا تنسانا من خالص الدعاء ، بأن يوفقنا الله سبحانه وتعالى فى تطبيق هذه المهارات وتنفيذها فى أرض الواقع لاختيار شريك الحياة أيضاً :)

لأ اوعى تخاف الوقتى ... احنا فى اولها كده مش هتتنيل ...  هتلاقي نفسك بقيت مسوق ناجح وهتتعلم ازاى تسوق وكمان اى تجيب العروسة لحد باب البيت :)

فى البداية التسويق هو علم وفن ، ياعنى كلمتين كدا بتعرفهم وبعد كدا مهاراتك الشخصية بتشتغل بقه  ....

ياعنى شوف ميسى عمل ايه ، ميسى ميسى يامعلى حسى  ؟

المهم المسوق الناجح لازم فى البداية يحدد هدفه ايه اللى هو محتاجه ؟ 

هنلاقى الهدف هو " العروسة " أو العريس برده عشان البنات الحلوين ميزعلوش مننا ،

 طيب حلو أوى ، حددنا الهدف هو العروسة ، طيب شوية تفاصيل صغيره كدا عشان الرؤية تظهر قدامنا كدا ونعرف ايه مواصفات الهدف بتاعنا ( العروسة ، العريس )

عاوزين بقه عروسة ياشباب ألوانات ايه ، وميك اب ايه والحاجات دى ولا عاوزين عروسة بنت حلال كدا تصونك وتربى أولادك ؟

وانتى يأعسولة برده عاوزه ايه ؟

ياعنى شوية التفاصيل هتساعدنا فى الوصول لنتائج ايجابيه عند دراسة السوق ..

وبعد تحديدنا الهدف ،

 الان  جاءت النقطة المهمة وهى دراسةالامكانيات الموجوده عندك

ياعنى ياعم الأمور تشوف الأول امكانياتك ايه ، ومعاك فلوس عشان نخلص منك وتتجوز وتدخل عش الزوجية :) ولا بعد مانخلص تقول طيب هتجوز منين ؟!

ولما تعرف امكانياتك اللى على أساسها هتشوف العروسة المناسبة ..

جاءت النقطة الهامة وهى دراسة السوق

عن طريق البحوث التسويقية ودراسة السوق لابد من معرفة امكانيات المنافسين " اللى هما الخطاب التانين " ماهو سعادتك مش لواحدك اللى عاوز تخطب ، وكمان لو المنتج " العروسة " اللى سيادتك رايحلها بنت حلوة وأمورة ومحترمة ومتدينة أوعدنا يارب ،،

هتلاقى المنافسين كتير يبقى هنا نقف لحظة ونقول ايه اللى هيميزنا ؟

نقطة مهمة جدا وهو انك تصبح مميز عن الاخرين ازاى ؟

نقول الوقتى البنات محتاجة قلب طيب وحنين يخاف عليهم ، مش بتاع عضلات وكدا ، وكام ياعم هاتلها ورده ياعم وانت رايح ، وشوية امكانيات تانية ياعنى بقه الاجتماعى والثقافى والمادى ،، وكدا كمان  حسابك على الفيس بوك وتويتر يكون محتاج تنضفه ياكتكوت من اللى بالى بالك ، كمان تمسح صورك القديمه مع الناس الحلوين برده ، أقولك الأفضل  تعمل أكونت جديد ، وانتى برده ، بس طبعا البنات في منهم اللى عندها كمية أكونتات رهيبة .

وبعد ماتتميز ، تبدأ تدرس المنتج بقه اللى هو العروسة وتشوف  

هتختار ازاى وهنا النقطة الجوهرية وهى انك تبدأ تشتغل على الدوائر الصغيرة ثم تكبر تكبر لحد ماتروح تجيب عروسة من الفلبين .... ياعنى ابدأ بدائرة المعارف الاقارب الجيران ، والأصدقاء ،، وهكذا ..

الحمد لله وجدتها ولقيتها ، واستقريت خلاص ياعمنا ، المواصفات اللى انت عاوزها..

روح بقه واتقدم بس بقولك استنى ،، ياعنى من مميزات المسوق الناجح انه يكسر حاجز فى الاجتماعات الرسمية والدخول الى قلب العميل ، عن طريق جعل العميل يتحدث عن أشياء يحبها ..

طبعا دورك هنا وهو جمع كافة المعلومات عن المنتج اللى هو العروسة ومش هفكرك تانى ،، عن أهلها ، مستواهم المادى ، ومستواهم الاجتماعى ، بيحبوا ايه ، بيكرهوا ايه ، بيأيدوا السيسى ولا مرسى ،،، الزمالك ولا الأهلى ... هيشجعوا مين فى كاس العالم .... وهكذا ...

وطبعا أوعى تنسى ياعمنا الهدف الأساسى وفكر بقه الهدف الأساسى مين .... لازم تعرف ايه اللى بيحبه وبيكرهه عشان تدخل لقلبه على طول وخليك فاكر يسرية ، كل بنت جواها يسرية صغيره تموت فى الورد ،، هاتلى وارده يابرااااااااااهيم ...

هاتلى ورده يابراهيم

وبكدا يانجم انت الوقتى عرفت ازاى تدخل ، البيت وقلب أهل العروسة وقلبها كمان ، والبنت دائما تحب الكلمة الحلوة الطيبة اللى يخاف عليها ، اللى يعاملها بان لها شخصية تختار وتحب وتكره ، ياعنى لا تدبرها على شئ

مبروووووك الخطووووبة وبعد شوية الجواااااااااااااااااااز  صح

عاوز الموضوع يستمر لازم تتميز بشئ مهم جدا عند شركات التسويق الكبيرة وهو خدمات مابعد البيع ياعنى عاملها وكأنها عميل دائما ، وحاول دائما ارضائه ،، وانتى كمان الكلام لكى يا استاذه ياعنى مو من أول شهرين عسل الدنيا تمشى وبعد كدا يطلعلنا عم حسن البواب :)

معلومات سعيدة وجوازه هنية تكفى فى العزومة 100 واوعوا تنسوا تدعولى ولو شوفتولى عروسة ،، مش مستعجل عادى ممكن ندخل اختبار المنتج لمدة اختبار لاتقل عن عام ولا تزيد عن 10 أعووووااام ياحبيبى ياحلوين .

شكرا ياشرين يابدر فكرتك رائعة

تحياتى 

جمال الوصيف